Soðningur

Þá er fyrsta skóladeginum samkvæmt stundaskrá lokið. Fór í íslensku 0155 hjá Finni Friðrikssyni sem kom vel fyrir og kynnti efnið og áætlun misserisins vel. Við munum fræðast um málið okkar fallega frá málfræði til málnotkunar í riti og ræðu og allt þar á milli.

Haustið minnir hressilega á sig hér á Akureyri, kalt og hvasst, laufin byrjuð að gulna og hrynja af trjánum. Mér finnst haustið ágætt, gott að hafa bjart á daginn og dimmt á kvöldin og á nóttunni.

Þar sem ég er nú skóladrengur reyni ég með hverjum degi að temja mér námsmannasiði og ég bý við þau forréttindi að eiga fulla frystikistu af fiski og þá er vel við hæfi að sjóða sér ýsu í hádeginu. Það má alltaf redda deginum með soðningi sagði maður einn!

Helgin fór að mestu í ólifnað, garðpartí og læti sem var gaman. Orðið partí er skemmtilegt, ég hef oftast séð það skrifað partý með ý(www.partybudin.is), í orðabókinni sem ég hef undir höndum er þetta klárlega ritað partí. 

Annað skemmtilegt, flestir kannast við orðatiltækið ,,það er ekki hundrað í hættunni". Vinur minn hélt lengi vel að það væri ,,ekki hundur í hettunni" annar vinur til sem reyndar er vinur okkar beggja sagði mér um helgina að hann segði alltaf ,,hundar í hættunni"............ og í morgunn sagði kennarinn einmitt ..hundrað í hættunni.. og þá fórum við yfir þennan útbreidda misskilning. Uppruna þessa orðatiltækis fórum við ekki nánar í en hann lofaði að gera það síðar. 

Jamms og kjamms, farinn í bæinn að skoða afmælisgjafir og skólabækur.

Næstu helgi er tvöfalt þrítugsafmæli á föstudegi, brúðkaup um miðjan dag á laugardag og þrítugsafmæli um kvöldið í Svarfaðardal, þetta endar með ósköpum!

Drekktu í hófi og haltu þig vel,

helst mun það gamanið veita.

Vínið er görótt og varla ég tel,

virði þess eftir að leita.

 Magri

Athugasemdir

[Lynja (IP-tala skráð) 29.8.2006 kl. 01:32]

Sjaldan launar kálfurinn ofbeldið!!

[Rósa María Sigbjörnsdóttir (IP-tala skráð) 29.8.2006 kl. 20:28]

Alltaf gaman að ná Finni á flug um íslenskuna ;) Annars góða skemmtun í skólanum, skellir þér svo bara til mín í æfingakennslu eftir 2 ár en er einmitt að fara að taka á móti mínum fyrstu nemum í vetur!! Ég stend ennþá við loforðið síðan í brúðkaupinu, stærðfræðikennsla fyrir lífstíð, þú bjallar bara ef það er eitthvað ;)þarft þess nú örugglega ekki samt...
Bið að heilsa frænku :D