Markmiðum náð, blómlegt

Sumarið hefur tekið völdin og fíflarnir á lóðinni bíða þess að verða slegnir, sorglegt að þurfa að róta við þessum fallegu gulu blómum! Annars er það af mér að frétta að ég var á sjó allan maímánuð, fór fyrst á Björgvin svo 4 túra á Björgúlfi þar sem ég tók tvo sem kokkur. Aflabrögð voru góð. Í dag fer ég aftur um borð í Björgvin sem er mjög jákvætt enda líður mér betur þar, betra skip og betri andi. Ég reyni að fara nokkra stutta túra fram í júní en svo er erfinginn væntanlegur þann 13. júlí, 34 vikur eru því liðnar af meðgöngu og allir eru hressir eins og kostur er,

Við fórum út að borða á Friðrik V. á laugardagskvöldið með Kötu og Stjána, ljómandi fínt, hittum svo Frey og Silju á eftir sem er alltaf gott. Sjómannadagurinn hefur lagst í dvala af mannavöldum hér á Akureyri og því voru engin hátíðahöld. Mér finnst að bærinn gæti sett pening í þennan dag og menningarfulltrúi á launum gæti skipulagt dagskránna. Ég held að næsti sjómannadagur verði Akureyringum og sjómönnum þeirra til sóma, botninum er náð og leiðin hlýtur að liggja uppávið!

Stjáni og Kata gerðu góða veislu í gær í tilefni sjómannadagsins og grilluðu nautalund frá Brasilíu, afar ljúffengt kjöt. Auk okkar voru Gunni mágur og Dóra kærastan hans, vinafólk og nágrannar og par frá Alaska sem verið hafa hér á Akureyri í tengslum við háskólann, mjög gefandi andrúmsloft og góð veisla með góðu fólki. Við Kristbjörg fengum okkur svo ís og horfðum á sjónvarpið.

Markmið vetrarins voru að standa vel skil á kennaranáminu og að klára BA-mannfræði, þessi markmið náðust svo sómi er af og einkunnir hafa skilað sér sem allar eru fullnægjandi og ég er glaður og sáttur.  

Jón Ingi vinur minn á afmæli í dag, 31 árs, til hamingju með daginn, hann og Hugrún ætla að eignast barn fyrir jólin. Einar Sveinn og Erna í Grindavík eignuðust fyrir viku annan strák og fleiri ætla að fjölga sér í kringum okkur. Ég er staddur á skemmtilegum stað í lífinu, finnst lífið yndislegt.  

Svo lengi lærir sem lifir.

Magri

Athugasemdir

[Skafti og Helga (IP-tala skráð) 8.6.2007 kl. 13:26]

Hæhæ og til hamingju með árangurinn í náminu! Alltaf svo gaman þegar vel gegnur!  Gaman að heyra af enn fleirum sem eiga von á litlum ljósum:) Biðjum kærlega að heylsa Kristbjörgu og vonumst til að hitta ykkur sem first.

Bestu kveðjur

Skafti Rúnar, Helga Hrönn og bumbukrúttið 

[Ronja (IP-tala skráð) 18.6.2007 kl. 00:30]

Til hamingju með útskriftina!!!

sat allan þennan svakalega langa tíma sem það tók að útskrifa þá tæplega 800 sem mættu í gær... skil vel að þú hafir slaufað því! Hafið það gott