Eyjafjörður og við

Lífsins ljúfu stundir:)

Fjölskyldan er lífið.

Ása Eyfjörð 2 ára í dag

Svo sannarlega hefur líf okkar orðið betra eftir að Ása fæddist. Hún er skemmtileg og lífsglöð stelpa sem gefur af sér mikla gleði og hamingju. Ása er mikill fjörkálfur sem vill hafa líf og fjör, henni finnst best að vera úti að leika, gaman að teikna og syngja og að sjálfsögðu er dásamlegt að eiga Ægi litla bróður til að tuskast með:) Elsku Ása okkar til hamingju með afmælið.

Magri 

Laugarvatn og 21,1 km

Sumarið er gott og ljúft. Við fjölskyldan fórum á Laugarvatn í viku þar sem við dvöldum í kennaraíbúð. Lékum okkur mikið saman, fórum í göngutúra, fórum í sund, keyrðum að Geysi og fórum á Veiðisafnið á Stokkseyri þar sem m.a. mátti sjá uppstoppuð ljón og apa sem okkur þótti öllum áhugavert. Gott að vera á Laugarvatni.

Í gær 11. júlí hljóp ég hálft maraþon í blíðskaparveðri hér á Akureyri í Landsmótshlaupi UMFÍ. Mér gekk vel að hlaupa, mikið líf og fjör í bænum sem hvatti mig áfram, lifandi tónlist á nokkrum stöðum, fjölskyldan mín var í göngugötunni þegar ég fór síðasta sprettinn. Ég stefndi að vera undir 2 klst og það gekk eftir, hljóp þessa 21, 1 km á 1 klst, 50 mínútum og 43 sekúndum. Mjög sáttur.

Í gær áttum við notalegar stundir á Illugastöðum með mömmu og pabba, systrum mínum og mökum og börnum í sumarbústað. Ása varð eftir og finnst frábært, nóg um að vera, krakkar að leika, sund og amma og afi sem stjana við hana. Framundan hjá mér er garðurinn.

Magri

Hálft maraþon klárt!

Í dag viðraði vel til langhlaupa. Ég hljóp af stað og kom heim eftir 110 mínútur eftir að hafa þá hlaupið rétt tæplega hálft maraþon (21,1 km).

Ég ætlaði að prófa það fyrst á Landsmóti UMFÍ hér á Akureyri 11. júlí en í dag var ég tilbúinn og meira að segja undir þeim tíma sem ég hafði stefnt að.  Þann 11. júlí ætla ég að hlaupa aftur hálft maraþon í löglegri keppni og setja mér þá markmið með tíma.

Ég hljóp fram að Kristnesi gegnum Kjarnaskóg og Drottningarbraut til baka. Líkaminn var í góðu standi þó hann þráði vatn og suðusúkkulaði eftir hlaup. Mikið er gaman að hafa klárað þetta. Skyldi ég geta hlaupið heilt maraþon?

Magri

Góð skipti

Þegar Ása Eyfjörð átti 1 árs afmæli var ég á sjó, Kristbjörg heima með Ægi í maganum. Ég hef alltaf sagt að sjómennskan gerði mér margt gott og sú reynsla er dýrmæt. Ég vildi verða kennari, ég vildi vinna vinnu sem gerði mér kleift að vera heima þegar börnin væru heima, svo við Kristbjörg gætum eytt flestum stundum saman með þeim.  Nú er ég orðinn kennari, finnst gaman að kenna og er ánægður með kjörin og vinnutíminn er einmitt þannig að ég er heima þegar börnin mín eru heima. Þetta kalla ég góð skipti.

Stundirnar sem við eigum saman, ættu ekki að mínu mati, að byggjast á sjónvarpsglápi eða á rándýrum leikföngum. Ása Eyfjörð dýrkar að vera úti, leika í sandinum, róla, rölta og hitta kisur og hunda eða gefa fuglum brauð. Að ganga á brú yfir læk með dóttur minni er frábær minning. Að svara eilífum spurningum dóttur minnar er frábært.

Að vera í sveitaferð og sýna syni mínum heiminn er frábært. Að kitla Ægi og knúsa, horfa og hlusta á hann hlæja er mjög gaman og gott. Að eiga góða konu sem gerir skyrdrykk handa mér er dásamlegt.

Ég er sáttur, hvorki of né van, hinn gullni meðalvegur lætur mér líða vel.

Annars erum við hress og kát. Ég útskrifaðist formlega 13. júní sem kennari frá Háskólanum á Akureyri en þar er bara útskrifað einu sinni á ári, ég kláraði námið í lok október. Ég er búinn að sækja um meistaranám í menntunarfræði með áherslu á stjórnun skólastofnana nú í haust og tek það með vinnu í Naustaskóla. Áætla að það taki mig 3-4 ár ef allt gengur upp.

Varðandi Icesave. Það er undarleg staða að þurfa að berjast fyrir því að fá að vera með sem þjóð meðal þjóða! Jón Sigurðsson og félagar eyddu drjúgum hluta ævinnar í baráttu sem fólst í því að standa ein og sér! Nú er okkur stillt upp við vegg og hótað að fá ekki að vera með sem þjóð vegna  Björgólfs og félaga í Landsbankanum, maðurinn gengur ennþá laus!

Stöndum við þennan samning, smölum öllum þeim sem bera ábyrgð á tilkomu hans saman og látum þá vinna samfélagsþjónustu svo lengi sem samningurinn er virkur, það er sanngjarnt.

Það fór eins og ég óttaðist með stjórnmálamennina. Þeir eru búnir að gleyma hver stóð vaktina í undanfara hrunsins og stjórnarandstaðan kennir nú þeim sem stjórna um hvernig komið er fyrir okkur ræflunum. Flokkarnir halda sínum döpru vinnuaðferðum, þeir sem stjórna hlusta ekki einu sinni á góðar hugmyndir andstöðunnar og þeir sem eru á móti telja allt vitlaust sem stjórnin gerir. Nýtt Ísland verður ekki til með þessum hætti. 

Mín tillaga og þá sammælis ég Davíð Oddssyni um að við þessar aðstæður á að vera þjóðstjórn, hver þingmaður stendur fyrir sitt atkvæði og meirihlutinn ræður. Fagmenn verða ráðherrar og framkvæma hlutina í umboði alþingismanna.

Ég veit að Ísland mun hrista þennan skuldabagga af sér og brosa í sátt og samlyndi með öðrum þjóðum. Ég ætla að segja börnunum sannleikann um manneskjuna, kenna þeim að forðast græðgi og spillingu og benda sem flestum að rata hinn gullna meðalveg.

Það er gott að vera í sumarfríi, heima með fjölskyldunni, heima á góðum stað á góðu landi sem fór of geyst, en á alla möguleika á að kenna börnum framtíðarinnar, að haga sér eins og við viljum að fólk sé flest!

Magri

Kreppuljóð

 Sá þetta ljóð hjá fyrrum samstarfskonu og finnst það fyndið en sorglegt

2007

Ég á minnsta húsið í götunni,
húsið sem stendur hjá Lödunni.
Þegar granninn rennir í pottinn hjá sér
kólna allir ofnarnir hjá mér.

Eftir að granninn gerði upp garðinn hjá sér
skín ekki sólin lengur í garðinn hjá mér.
Granninn fær ráðherrana í grillið til sín
og bræluna leggur svo yfir til mín.

Granninn á jeppa af flottustu sort,
en ég á bara ljóta Lödu Sport.
Ég fer í vinnuna með rútunni,
en hann með einkaþyrlunni.

2008

Konan hans eldist ekki hætings hót,
en mín er alltaf bæði feit og ljót.
Granninn er stæltur og með hárið ljóst,
En ég er bæði með ístru og lafandi brjóst.

Þegar granninn er með veislu hjá sér,
býður hann öllum, öllum - nema mér.
Elton John skemmti lýðnum í afmælinu,
en ég hafði bara efni á Breiðbandinu.

Óþolandi er oft, vel stæði granninn minn,
Það trúa því fáir, að hann sé sonur minn.

2009

Nú er hann kominn á heimilið mitt
og fluttur í gamla herbergið sitt.
Í kreppunni hann missti allt sitt fé.
Og nú á hann minni pening en ég.

Það kviknaði í báðum jeppunum,
og konan er farin frá honum.
Nú hangir hann heima rosa down,
og bölvar og ragnar Gordon Brown.

Höfundur ókunnur

Magri

Fjölskyldumyndir

Fjölskyldan nýtti tæknina og tók fjölskyldumynd á tíma! Í dag þarf ekki að spara filmuna eða að hafa áhyggjur af því að gleyma að setja eina í. Við verjum góðum gæðatíma saman, það var einmitt ein af ástæðum þess að ég gerðist kennari, gera það sem mér finnst gaman og gefandi og vera heima þegar börnin og konan eru heima. Kristbjörg, Ægir, Ása, Gunnþór.

Prinsessan Ása Eyfjörð í Reykjavík á leið í brúðkaup. Mikið dásamleg stúlka hún er. Ása er sem fyrr mjög ákveðin stúlka, hennar helsta áhugamál er íslensk tunga! Hún er sólgin í að læra ný orð, spyr og fær svar,hermir eftir, hlær og grallarast. 

Mér hefur vegnað vel í lífinu. Ég á frábæra fjölskyldu og vini og vinn við það sem mig langaði að vinna við. Framundan er lífið og ég er stöðugt að reyna að bæta mig sem manneskju. Ég er óhræddur við að viðurkenna mistök í samskiptum, ef ég breyti rangt vil ég fá tækifæri til að gera betur. Ég vil að mér og öllum í kringum mig líði vel. Mér líður best með fjölskyldunni og börnin okkar Kristbjargar hafa veitt mér meiri hamingju og gleði en ég hefði getað ímyndað mér. Samveran er lykill að hamingju minni.

 Ása Eyfjörð og Ægir Eyfjörð. Ása er mjög góð við bróður sinn. Hún leggst hjá honum og leyfir honum að leika með dótið sitt. Ægir er byrjaður að hlæja að systur sinni þegar hún er að grallarast og þau eiga eflaust eftir að vera dugleg að leika sér saman.

Prinsinn á heimilinu Ægir Eyfjörð er fæddur í kreppu og lærði strax að safna forða á alla mögulega staði! Hann er mjög duglegur að drekka mjólk og er byrjaður að fá graut. Á þessari mynd er hann 4 mánaða. Hann er þéttur á velli en farinn að vinda aðeins uppá sig á gólfinu og þá er stutt í snúning á magann. Hann er farinn að þenja raddböndin og kann til dæmis að "væla" þegar við setjumst að snæðingi og þá veit hann (ef hann vælir nógu mikið) að hann fær að sitja í Búmbó uppi á borði eða í fanginu á okkur. Skynsamur drengur:)

Ása Eyfjörð getur dundað sér með skó og föt og finnst ákaflega gaman að sýna okkur hvað hún er dugleg að klæða sig. Henni finnst líka eðlilegt að setja Ægi í föt eins og hún gerir við dúkkurnar sínar enda er hann skemmtilegasta dúkkan. 

Já já þannig er nú það. 

Magri

Lífið er dásamlegt!

Sólin er frábær!

Magri

Veðrið

Það er kominn maí og grasið tekið að grænka. Meðalhitinn á Akureyri í síðasta mánuði var 3,5 stig , sem er 1,9 stigum fyrir ofan meðallag. Úrkoman mældist 27 millimetrar , sem er fimmtungi undir meðallagi. Alhvítir dagar voru fimm og er það sex dögum færri en í meðalári. Sólskinsstundirnar voru 82 , sem er 48 klukkutímum undir meðallagi. Svo lítið sólskin hefur ekki mælst á Akureyri í apríl síðan 1992 (Tekið af vef RÚV).

 

Veðrið heldur áfram að spila stóran þátt í lífi okkar Íslendinga og þar er engin kreppa né samdráttur, það er áfram nóg framboð af fjölbreyttu veðurfari. Við fjölskyldan dvöldum í Reykjavík síðasta fimmtudag og til þriðjudags þar sem við hittum fjölskyldu og vini, fórum í brúðkaup, ég var í skólaheimsóknum vegna undirbúnings Naustaskóla og svo skoðuðum við í verslanir og röltum um bæinn. Þann 1. maí fórum við og röltum Laugaveginn í ausandi vatnsveðri, hálftíma síðar stytti upp og dásamleg sólin hélt okkur brosandi og heitum er við gengum um borgina og nutum mannlífs. Klukkutíma síðar kom aftur hellirigning og þannig má segja að veðrið hafi verið það sem eftir lifði ferðar að mestu. Veðrið er gjarnan í aðalhlutverki.

 

Börnin dafna vel. Ása Eyfjörð grípur hvert orðið á fætur öðru, setur saman þrjú orð í setningarhluta, spyr og spyr og fær alltaf svar, það er mikilvægt. Ása hættir hjá nunnunum í dagvistun í júlí og byrjar á leikskólanum Hólmasól í ágúst, hann er 70 metra sunnar í götunni. Ægir Eyfjörð er duglegur strákur, hjalar og hlær, grípur um hluti og fær ómælda athygli frá okkur og systur sinni. Ægir fer svo til nunnanna í haust sem er mjög jákvætt því umönnun og ást þeirra á börnum er uppvexti þeirra í hag.

 

 Í sumar ætlum við að hafa það gott hér heima og njóta þeirrar ómældu veðurblíðu sem framundan er!

 

Magri

Fínt páskafrí og 15 km hlaup

Þá er páskafríið á enda og vinnan byrjar aftur á morgun. Við áttum góða daga með fjölskyldu og vinum. Vorum töluvert á Dalvík á skíðum, sleða og göngu og snæðingur með fjölskyldunni. Hittum allar ömmur og afa, lékum okkur og borðuðum páskaegg. Dagarnir voru ljúfir og góðir.

Ég lokaði páskafríinu í dag með hlaupi frá Þelamörk og hingað heim að hlaði sem eru 15 kílómetrar og tíminn var 80 mínútur. Þetta er það lengsta sem ég hef hlaupið án þess að stoppa á minni ævi. Framundan er hálfmaraþon 21 km við Mývatn 30. maí og ef líkaminn verður áfram sterkur þá ætti ég að klára það.

Börnin eru hress og kát, dafna vel. Kristbjörg er hress. 

 Ása Eyfjörð er fjörkálfur, dugleg stelpa sem lætur okkur líða vel.

 Alltaf eitthvað að brasa og gera skemmtilegt. Tveggja ára í sumar:)

 Ægir Eyfjörð er 3 mánaða og er mjög duglegur að drekka og sofa á nóttunni:)

Feðgar. Ægir brosir mikið og hjalar.

Það þarf ekki að kvarta.

Ég er orðinn frekar spenntur að byrja í nýju vinnunni við Naustaskóla. Fyrsti kennarafundur var haldinn skömmu fyrir páska þar sem við kynntumst og skoðuðum skólann sem enn er verið að byggja. Á næstu dögum hittumst við aftur og kynnum okkur skóla syðra sem er svipað uppbyggður og Naustaskóli er fyrirhugaður. Við ætlum líka að hafa vinnuhelgi og byrja að skipuleggja starfið enda þarf að mörgu að hyggja við opnun nýs skóla. Svo fer allt á fullt í byrjun ágúst.

Munum svo að kjósa 25. apríl og nýta atkvæðið okkar í þágu samfélagsins alls. Ég ætla að kjósa og hef gert upp hug minn sem hefur þróast, breyst og vonandi batnað:)

Magri